【谷埔蘆葦田】鹿頸 – 鳳坑 – 谷埔｜欣賞日落黃金蘆葦田｜輕鬆郊遊．BB級行山路線（附詳細交通、行山路線）

睇完 鋒加西亞 – 德國工作假期後的世界流浪 去隱世蘆葦田既文章之後一直都好想去，

有一日放假，小編們終於「的起心肝」由去粉嶺出發，

鹿頸落車再經鳳坑村走入谷埔欣賞日落蘆葦田。

鹿頸 – 鳳坑 – 谷埔

影片分享

---

鹿頸 – 鳳坑 – 谷埔 郊遊路線

詳細路線可以參考埋 鋒加西亞 – 德國工作假期後的世界流浪，我哋都係跟住呢個路線行。

粉嶺火車站 C出口乘56K小巴，在「鹿頸」總站下車。
沿新娘潭路一直走到「發記士多」轉左再轉左，
正式進入郊游徑，沿郊游徑行1 小時即到達谷埔蘆葦田。
回程沿原路回下車地點，乘56K小巴回粉嶺火車站。

全程大約 7 公里，慢慢拍照+遊玩都只係 3 小時來回 (路程大約 2 小時）
全程只有大約 10 分鐘平緩梯級 ，其餘都是平路，
是一條適合一家大細郊游的「BB級路線」。

---

粉嶺火車站 C出口乘56K小巴，在鹿頸總站下車。

見到BB 開心士多之後係總站落車，沿新娘潭路一直向前走到「發記士多」指示牌轉左之後係「發記士多」前再轉左，正式進入郊遊徑。

經過幾間村屋穿過樹蔭後，就會見到呢個咁開揚嘅景色啦！

啲水仲好清好清！真係估唔到香港會希一個咁靚嘅地方呀～

行前少少會見到紅樹林，如果同小朋友一齊黎就可以同佢一齊欣賞下紅樹林嘅生態，

潮退時仲希樹會見到彈塗魚！

全條路線都好簡單而且路面十分平坦！

行到一半會見到分叉路口，要依指示沿海邊行就可以繼續向谷埔方向前進。

過咗分叉路口後向前行會見到一個涼亭，

就即係我哋黎到全條大約1 小時嘅路線唯一一段樓梯路啦！

呢一段樓梯路係大約 5 分鐘上，之後一段短短嘅平路再落 5 分鐘樓梯就可以完成！

梯級同梯級之間唔高，算係一段十分平緩嘅樓梯。一家大細都應該輕鬆行到

行完樓梯後一直沿路行大約 10 分鐘左右就會到達鳳坑村！

雖然鳳坑村係唔可以進入參觀，但係離遠睇都已經覺得好靚～ 好似一幅美麗嘅鄉村圖畫咁

大家千祈唔好走入村，打擾村民同破壞呢度嘅寧靜呀！

係村口有大大片嘅蘆葦田，黃昏嘅時候黎呢度真係好靚。

身為城市長大既城市寶寶係呢一刻都有少少嚮往鄉村嘅寧靜～

欣賞完鳳坑村嘅美景後再向前行少少就會見到呢個小碼頭，碼頭嘅盡頭有小燈柱。

配合全身後嘅海景同山景，呢個T11 碼頭成為咗一個熱門嘅影相打卡位～

影完相就繼續向前行～～～

一直沿住海邊既平路行，沿途欣賞紅樹林同海景行大約 5 分鐘，就會見到另一個景點

對面呢一個看似係海中心既小沙洲，係潮退嘅時候係可以行過去嫁！

大家如果想過去就要留意返潮夕漲退嘅時間啦！

經過小沙洲後，繼續繼續沿海邊行大約 20 分鐘左右就會見到呢間已經荒廢咗既啟才小學，

唔好睇少呢間學校，佢係一間有近80年歷史嘅三級歷史建築！

而啟才小學對面就係望住呢一個咁靚嘅景色，有山有水有花。係真真正正嘅人傑地靈～

欣賞完歷史建築後，再沿海邊繼續行就可以欣賞到左邊海景，右邊山水景。

呢個風景真係好靚係一個適合畫畫既好地方。

沿住海邊行多 5 分鐘左右就會到達谷埔村村口！見到呢個指示牌轉左就係去谷埔碼頭

同剛剛係鳳坑村村口嘅碼頭差唔多，都係一個好好嘅影相打卡位 (呢個位可能會少人啲～～）

影完碼頭相後行返去谷埔村村口指示牌轉右就會見到呢一條小徑，一直行就會到達蘆葦田啦！！

雖然2 月唔係蘆葦最盛開嘅季節但係呢一個夕陽慢慢落下，

映照係蘆葦上閃閃發光嘅畫面真係好夢幻好靚呀！

Zoom近啲再睇下！呢一個情景真係一啲都唔似係香港～

好似童話世界入面既田野一樣，好靚好靚好靚！

（不過大家千祈唔好嘗試落田，如果唔係應該真係會泥足深陷！！)

欣賞完呢個咗靚咗夢幻既景色後，就係時候沿原路回程啦～

一邊返返去鹿頸落車位，一邊欣賞日落就為今日嘅行程畫上完美嘅句號。